Жәрдемақы Елбасы Нұрсұлтан Назарбаевтың тапсырмасына сәйкес 30%-ке өседі

Биыл 1 шілдеден бастап мүгедек баланы тәрбиелеп отырған ата-анаға тағайындалатын жәрдемақы мен бала кезінен I топтағы мүгедекке күтім көрсететіндерге берілетін жәрдемақы көлемі өседі, деп хабарлайды Сity04.kz "Азаматтарға арналған үкімет" мемлекеттік корпорациясының баспасөз қызметіне сілтеме жасай.

"Нұр-Отан" партиясының XVIII съезінде тұңғыш президент Нұрсұлтан Назарбаевтың берген тапсырмасына сәйкес мүгедек балаларды тәрбиелеп отырған отбасыларға берілетін жәрдемақы көлемі 30%-ке өсуі тиіс болатын.

Қазір мүмкіндігі шектеулі балалары бар отбасылар ең төменгі күнкөріс деңгейінің 1,05 мөлшерінде, яғни 31 183 теңге жәрдемақы алып отыр. Айта кетсек, Қазақстанда ең төменгі күнкөріс деңгейі - 29 698 теңге.

Корпорацияның мәліметіне сүйенсек, Қазақстанда жәрдемақының осы екі түрін 95 мыңнан астам адам алады. Олардың 82 мыңға жуығы мүгедек баланы тәрбиелеп отырғандар болса, 13 мыңнан астамы - бала кезінен I топтағы мүгедектерге күтім көрсететіндер.

Жылдың ортасынан бастап өсетін жәрдемақыны "Азаматтарға арналған үкімет" мемлекеттік корпорациясының бөлімшелері мен еңбек комитетінің өңірлік департаменттері автоматты түрде қайта есептейді және бұл үшін жәрдемақы алушылар қосымша құжат тапсырмайды.

Жәрдемақы шілденің және келесі айлардың 1-інен 15-іне дейін жұмыс күндері тағайындалатын болады.