26 желтоқсан күні ҚР Сыбайлас жемқорлыққа қарсы іс-қимыл агенттігінің Төрағасы Алик Шпекбаев, Ақтөбе облысының әкімі Оңдасын Оразалин жұмыс сапарымен Хромтау ауданында болып, "Aǵtóbe-adaldyǵ alańy jobalyǵ keńsesiнің", "Ашық әкімдіктің" жұмыстарымен танысты, деп хабарлайды City04.kz.
Биыл ғана пайдалануға берілген әкімшілік ғимаратында сыбайлас- жемқорлықты болдырмауға бағытталған жұмыстар талаптарға сай жасалған. Аудан әкімі Нағымжан Алдияров халықпен тығыз әрі ашық қарым- қатынас орнату мақсатында әлеуметтік желілерде тікелей байланыста тұрғындардың сауалдарына жауап беретіндігін жеткізді.Әкімдікте сондай-ақ, өзіне-өзі қызмет көрсету бұрышы ашылған.
Сыбайлас жемқорлыққа қарсы іс-қимыл ұлттық бюросының Ақтөбе облысы бойынша департаментінің басшысы Мирлан Мұхамбетов үстіміздегі жылы Хромтау ауданында сыбайлас- жемқорлыққа қатысты бірде-бір фактінің тіркелмегенін айтты. Агенттік төрағасы мұны аудан экономикасының жақсаруымен байланыстырды.
Ауданда ауыз су, көгілдір отын 95%, жол 85-90%, аулаларды қалыпқа келтіру 100% шешімін тапқан.Ақтөбе облысындағы барлық аудан әкімдіктерінде "Aǵtóbe-adaldyǵ alańy jobalyǵ keńsesi" жұмыс жасайды.
Бұдан соң ҚР Сыбайлас жемқорлыққа қарсы іс-қимыл агенттігінің Төрағасы Алик Шпекбаев, облыс әкімі Оңдасын Оразалин Хромтау тау-кен техникалық жоғарғы колледжіндегі "Саналы ұрпақ" , "Адалдық алаңы", "Адалдық дүкені" жұмыстарын көрді. Ақтөбе облыстық білім басшармасының басшысы Ләззат Оразбаева білім саласындағы сыбайластықты болдырмау бойынша атқарылған жұмыстармен таныстырды.
Оқушылар мен жастардың бойында сенім атмосферасын қалыптастыруға арналған "Адалдық дүкені" облыс бойынша 35 колледж бен 324 мектепте ашылған. Ұстаздар арасында "Мен сыйлық алмаймын" акциясы өткізіліп, тамыз кеңесінде "Aǵtóbe-adaldyǵ alańy", білім басқармасы, аудан әкімдерімен үш жақты меморандумға қол қойған.
Жұмыс сапарының соңында агенттік төрағасы "Батыс Жер" кемпингінің және Нұр-Ақтөбе шағын ауданы"Expo" ғимаратындағы Алматы аудандық әкімдігінің сервистік қызметімен танысты.